Пиразан сармояи ночизи худро барои роҳсозӣ харҷ кардан хост

Давлаталӣ Саид, раиси вилояти Хатлон, зимни нишасти матбуотӣ аз як ҳодисаи таъсирбахш ёдовар шуд, ки ба гуфтаи ӯ, нишондиҳандаи ҳисси баланди ватандӯстӣ ва саҳмгузории мардум дар ободонии кишвар аст.
Раиси ин вилоят нақл кард, ки ҳангоми корҳои роҳсозӣ дар Кӯлоб, як пиразан, ки ба қурутфурӯшӣ машғул будааст, маблағеро, ки аз меҳнати худ ҷамъ карда буд, ба роҳсозон пешниҳод кардааст.
Ин зан ба роҳсозон муроҷиат карда, гуфтааст, ки маблағи ҷамъкардааш чандон зиёд нест, аммо мехоҳад онро барои сохтмони роҳ диҳад. Ӯ хоҳиш кардааст, ки маблағи ночизи ӯро қабул кунанд ва дар корҳои роҳсозӣ истифода намоянд.
Зеро, ӯ дарк мекунад, ки ҳиссагузорӣ дар роҳсозӣ чӣ қадар кори хайру савоб аст.
Ба қавли раиси вилояти Хатлон, ӯ дар арафаи ҷашни Рӯзи модар (8 март-ҶОМ) ин занро пайдо ва қадрдонӣ кардааст.