Дарёфти шаҳрвандӣ ва иҷозаи иқомат дар Русия боз сахттар шуд

Думаи давлатии Русия гирифтани шаҳрвандӣ ва иҷозаи иқоматро боз ҳам сахтар кард. Тибқи тағйироти ахир шаҳрвандони хориҷӣ дар сурати доштани доғи судии бекорнашуда ё адонашуда барои ҳар гуна ҷиноят аз гирифтани шаҳрвандии Русия, иҷозаи иқомати муваққатӣ ё РВП ва иҷозаи иқомати доимӣ, яъне ВНЖ маҳрум мешаванд. То кунун танҳо шахсоне, ки барои ҷиноятҳои қасдан содиркарда доғи судӣ доштанд, аз гирифтани шаҳрвандӣ маҳрум мешуданд. Барои гирифтани РВП ва ВНЖ бошад, маҳдудият танҳо нисбат ба шахсони маҳкумшуда барои ҷиноятҳои вазнин ва махсусан вазнин амал мекард.
Ҳамчунин тибқи тағйироти ахир ба қонун роҳҳои гирифтани шаҳрвандӣ тавассути издивоҷи сохта низ баста мешавад.
Раиси Думаи давлатии Русия Вячеслав Володин мегӯяд, қаблан баъзе муҳоҷирон бо занони солманди аз ҳаштодсола боло издивоҷи расмии сохта ба қайд мегирифтанд, то шаҳрвандии Русияро ба даст оранд.