Эдил Байсалов, муовини нахуствазири Қирғизистон пешниҳод намуд, ки низоми бидуни раводид барои шаҳрвандони Иёлоти Муттаҳида бознигарӣ шавад. Ӯ дар ин бора дар саҳифаи худ дар шабакаи X навиштааст. Бо ин изҳорот Байсалов ба талаботи нави чанде пеши Департаменти давлатии ИМА вокуниш нишон дод, ки тибқи онҳо шаҳрвандони Қирғизистон ҳангоми дархости раводиди корӣ ё сайёҳӣ ба ИМА бояд то 15 ҳазор доллар гарав гузоранд.
«Сиёсати раводид — масъалаи баробарӣ ва эҳтироми мутақобил аст. Агар барои шаҳрвандони мо чунин монеаҳои баланд ҷорӣ шаванд, мо наметавонем чунин вонамуд кунем, ки ҳеҷ чиз рӯй надодааст.», — навиштааст муовини нахуствазир.
Қоидаҳои нави раводид барои шаҳрвандони Қирғизистон, ки мехоҳанд ба ИМА сафар кунанд, аз 21 январ эътибор пайдо мекунанд. Ҳангоми супоридани ариза барои раводидҳои B-1 ва B-2 онҳо бояд гарав ба маблағи аз 5 ҳазор то 15 ҳазор доллар пардохт намоянд. Ин маблағ дар сурати иваз шудани мақоми муҳоҷиратӣ ё зиёд шудани муҳлати будубош баргардонда намешавад. Ҳаҷми гаравро корманди консулӣ ба таври инфиродӣ ҳангоми мусоҳиба муайян мекунад.
Ҳамзамон, довталабоне, ки раводиди онҳо тасдиқ мешавад, бояд танҳо тавассути се фурудгоҳ Логан (Бостон), Кеннеди (Ню-Йорк) ва Даллес (Вашингтон) вориди ин кишвар шаванд.
Шаҳрвандони ИМА аз соли 2012 метавонистанд бидуни раводид ба Қирғизистон ворид шаванд. Аммо шаҳрвандони Қирғизистон ҳеҷ гоҳ имкони ворид шудан ба ИМА бидуни раводидро надоштанд.
