Дар ин интихобот Зоҳран Мамданӣ, номзад аз Ҳизби демократ ва зодаи Уганда, ки 34 сол дорад, пирӯз шуд. Ӯ дар назди интихобкунандагон эълон намуд, ки аз 1 январи соли оянда ба вазифа шурӯъ мекунад. Бар асоси натиҷаҳои пешакӣ, тақрибан 50,4% овозҳо ба ҷонибдории ӯ дода шудаанд.
«Ман ҷавонам, гарчанде бисёриҳо кӯшиш карданд, ки маро пир нишон диҳанд. Ман мусалмонам. Бадтарин чиз ин аст, ки барои ин ҳама аз ҳеҷ кас узр намепурсам.», — гуфт Мамданӣ зимни суханронии худ. Ба гуфтаи CBS News, Мамданиро аллакай губернатори иёлати Ню-Йорк Кэти Ҳокул ва раҳбари ақаллияти Сенат Чак Шумер бо пирӯзӣ табрик намудаанд.
Як рӯз пештар аз интихобот, президенти ИМА Доналд Трамп таҳдид карда буд, ки агар Мамданӣ шаҳрдор шавад, кумакҳои давлатии Ню-Йоркро маҳдуд мекунад. Дар посух Мамданӣ дар нутқи худ ба Трамп муроҷиат карда гуфт:
«Ню-Йорк ҳамеша шаҳри муҳоҷирон буд, аз ҷониби муҳоҷирон сохта шуд, аз ҷониби онҳо идора мешавад ва аз имрӯз сар карда аз ҷониби як муҳоҷир раҳбарӣ мешавад. Пас, президент Трамп, гӯш кунед: агар хоҳед ба яке аз мо кор гиред, лозим меояд, ки бо ҳамаи мо сару кор гиред».
Ба гуфтаи Мамданӣ, ҳадафи асосии барномаи ӯ, ҷорӣ кардани андоз барои сарватмандтарин сокинони шаҳр, ройгон гардондани автобус, таъмини таҳсили томактабии ройгон барои ҳамаи кӯдакони то 5-сола мебошад.
