Истифодабарандагони дастгоҳҳои Apple дар Тоҷикистон акнун метавонанд пардохтҳои худро бидуни истифодаи кортҳои пластикӣ анҷом диҳанд. 28 июли соли 2026 дар Тоҷикистон маросими расмии роҳандозии низоми байналмилалии пардохтии Apple Pay баргузор гардид.
Дар ин чорабинӣ намояндаи Сафорати Тоҷикистон дар Иёлоти Муттаҳидаи Амрико тариқи маҷозӣ ширкат варзида, инчунин намояндагони мақомоти давлатӣ, ширкати Apple Inc., бахши бонкӣ, низомҳои байналмилалии пардохт, ширкатҳои технологӣ ва воситаҳои ахбори омма иштирок намуданд.
Аввалин бонкҳои шарики Apple Pay дар Тоҷикистон Alif Bank ва Humo Bank гардиданд. Муштариёни ин бонкҳо метавонанд кортҳои бонкии худро ба барномаи Apple Wallet пайваст намуда, бо истифода аз iPhone, Apple Watch ва дигар дастгоҳҳои мувофиқ дар нуқтаҳои савдо, барномаҳои мобилӣ ва сомонаҳо пардохтҳои ғайринақдӣ анҷом диҳанд.
Apple Pay барои тасдиқи амалиёт аз технологияҳои Face ID, Touch ID ё рамзи муҳофизатии дастгоҳ истифода мебарад, ки сатҳи баланди амнияти маълумоти молиявиро таъмин мекунад.
