Рисолат (номи шартӣ) хушунат дидааст. Ӯ ҷойи зист надорад ва дар бинои як муассисаи давлатӣ зиндагӣ мекунад.
Ин зан дар доираи лоиҳаи “Реинтегратсия барои занони зери хатар ва қурбониёни хушунат дар ноҳияҳои тобеи Тоҷикистон”, ки бо маблағгузори Созмони байналмилалии “Acted” аз ҷониби Ташкилоти ҷамъиятии “Маърифати шаҳрвандӣ” амалӣ гардид, давоми як моҳ ҳунари хайётиро аз худ намуд.
Рисолат ба ҳамтақдиронаш тавсия медиҳад, ки занон бояд ҳунаре дошта бошанд, то дар сахтиҳои рӯзгор ҳунар барояшон нон диҳад ва муҳтоҷ нагарданд. Натанҳо курсҳои дӯзандагӣ, балки кусрҳои пӯхтупаз ва ғайраро гузаранд.
“Ман дар як бинои корхонае зиндагӣ мекунам. Се духтарча дорам. Барои ман касби дӯзандагӣ бисёр муҳим буд. Ҳоло як дӯзанда барои дӯхтани як курта аз 60 то 100 сомонӣ ҳақмузд мегирад. Акнун ман дар ин курс дӯзандагиро аз худ кардам, минбаъд либоси худ ва фарзандонамро медӯзам, ки барои оилаи мо кумаки бузург хоҳад шуд.”,-гуфт Рисолат.
Рисолат метавонад либоси занони дигарро дӯзад ва аз ин роҳ барои худ даромад касб кунад.
Лоиҳаи қонун “Дар бораи соҳибкории иҷтимоӣ”, ки соли равон қабули он дар назар аст, “барои гурӯҳҳои аз ҷиҳати иҷтимоӣ осебпазири аҳолӣ ҷойҳои нави корӣ таъсис додан ва ба онҳо барои иштирок дар фаъолияти фоиданоки иҷтимоӣ бо дигар шаҳрвандон имкониятҳои баробар таъмин намудан, мусоидат ба фарогирӣ, таълим, роҳнамоии касбӣ, тайёр кардан, бозомӯзӣ, такмили ихтисос ва шуғли аҳолӣ, аз ҷумла шуғли мустақилона барои гурӯҳҳои аз ҷиҳати иҷтимоии аҳолӣ осебпазир”-ро мақсадҳои соҳибкории иҷтимоӣ медонад.
Лоиҳаи “Реинтегратсия барои занони зери хатар ва қурбониёни хушунат дар ноҳияҳои тобеи марказ (Ҳисор, Шаҳринав ва Турсунзода), ки бо дастгирии молиявии Созмони байналмилалии “Acted” аз ҷониби Ташкилоти “Маърифати шаҳрвандӣ” амалӣ гардид, бо мақсадҳои лоиҳаи қонун “Дар бораи соҳибкории иҷтимоӣ” мувофиқат мекунад.
Гулшан Исоқова ба 35 зан, ки Рисолат дар шумули онҳо буд, хайётиро омӯзонд.
“Ин занҳо аз оилаҳои камбизоат, хушунатдида ҳастанд, бархе ҷавондухтарон дар тарбияи бобову бибии пир буданд. Як моҳ дӯзандагиро омӯхтанд. Акнун ин занҳо ба ҳамсоягон ва дигар ҳамтақдирҳои хеш кумак мекунанд. Акнун бо ин ҳунар даромад ба даст меоранд.”, -гуфт ин омӯзгор.
Дар ҳамин ҳол, Маърифат Шокирова, роҳбари ТҶ “Маърифати шаҳрвандӣ” зимни расонидани грантҳо аз ин занон даъват кард, ки ҳам ба зиндагии худ сомон бубахшанд ва ҳам дасти занони ҳамтақдири хешро бигиранд.
Ахиран 17 зани зери хатар ва қурбонии хушунат дар навоҳии Ҳисор, Шаҳринав ва Турсунзода бо пешниҳоди лоиҳаиҳои хеш соҳиби грант шуданд. Аз ҷумла, чаҳор нафар аз шаҳри Ҳисор, даҳ нафар аз ноҳияи Шаҳринав ва се нафар аз Турсунзода. Ин занон бо беш аз сад зани осебпазир давраҳои омӯзиширо гузашта буданд ва дар поёни давраҳои омӯзишӣ лоиҳаи хешро пешниҳод карданд, ки дастгирӣ ёфт. Ба бархе мошинаҳои хайётӣ, дарзмол, ба бархе таҷҳизот барои пӯхтупаз, яхдон барои нигаҳдории маҳсулот ва ба қисми дигар чорво дода шуд то оянда зиндагии хешро беҳтар карда, истиқлоли иқтисодӣ дошта бошанд.
Мавзӯҳои омӯзиш, ки беш аз сад зан ҷалб гардида буд, пешгирии хушунати хонаводагӣ, баробарии гендерӣ, дастгирии оилаҳои осебпазир дар самти «Ҳассосияти гендерӣ, банақшагирии тиҷоратӣ ва ғояҳои он” ва дастгирии қурбониёни хушунат барои фаро гирифтани онҳо ба касбомӯзӣ ва рушди соҳибкории онҳо буд, ки марҳилаи аввали силсилаомӯзишҳои дурӯза аз санаи 15 то 28 феврали соли равон ва марҳилаи дуюми он аз 28 март то 5 апрел баргузор гардида буд.
Дар умум, 128 зан дар омӯзишҳои “Тавонмандсозии иҷтимоӣ ва иқтисодии занон” дар доираи лоиҳаи «Реинтегратсия барои занони зери хатар аз шаҳру навоҳии Ҳисор, Шаҳринав ва Турсунзода” ширкат карда буданд.
