Назар Назаров хатмкардаи зинаҳои бакалавр ва магистри Донишгоҳи омӯзгории Тоҷикистон ба номи С. Айнӣ буда, собиқаи 7-солаи омӯзгорӣ дар марказҳои забономӯзӣ дорад ва ба шогирдон забони англисӣ омӯзондааст.
Ҳоло як тарабхонаи Олмон ёвари ошпаз аст. Ӯ дар барномаи навбатии «Бол» доир ба забондонӣ, омӯзгорӣ, волонтёрӣ ва кори тарабхонаву нақшаҳои ояндааш гуфт.
«Дар Ватан корам хуб буд. Бо мақсади васеъ намудани ҷаҳонбинӣ ва донишу малака ҳамчун волонтиёр ба Олмон омадам. Имкон ба даст овардам, ки ба дигар давлатҳои Аврупо сафар карда, дониши худро такмил намоям.», — гуфт ӯ.
Назар як сол ҳамчун ихтиёрӣ фаъолият карда, акнун дар як тарабхона корашро идома медиҳад. Агарчи кори тарабхона барояш шавқовар нест, вале маҷбур аст то як соли дигар кор кунад. Агар давоми як соли оянда дипломаш тасдиқ шавад, имкон пайдо мекунад, ки дар дилхоҳ мактаб аз фанни забони англисӣ дарс гӯяд.
Ӯ дар Инстаграм ва Ютуб саҳифа дошта ба истифодабарандагони ин шабакаҳо дарси забони англисӣ меомӯзонад.
«Дарсҳое ки ҳоло дар Ютуб мегузарем, барои обуначиҳоям мувофиқанд. Ин корам имкон медиҳад, ки забони англисиро фаромӯш накарда, балки такрор кунам.»,- илова кард Назар.
Назар рӯзҳои истироҳат ба дигар давлатҳои Аврупо сафар кардан мехоҳад то ҷаҳонбиниашро васеъ намуда, баъди бозгашт ба Ватан аз таҷрибаву ҷаҳонбиниаш ба шогирд нақл намояд.
Ҳафизуллоҳ Тоҳирӣ
