Ширкати Microsoft ният дорад тавассути барориши вомбаргҳои дорои дараҷаи баланди эътимоднокии сармоягузорӣ дар ИМА ҳадди ақал 25 миллиард доллар ҷалб кунад. Дар ин бора Bloomberg бо такя ба манбаъҳои огоҳ аз муҳокимаҳо хабар медиҳад. Агар ин нақша амалӣ шавад, Microsoft бори аввал аз соли 2017 ба ин тараф чунин вомбаргҳоро пешниҳод мекунад.
Ба гуфтаи манбаъҳои Bloomberg, ширкат ба сармоягузорон то 10 навъи вомбаргро бо муҳлати пардохти аз ду то 40 сол пешниҳод мекунад. Ҳаҷми ниҳоии ҷалби маблағ ҳанӯз муайян нашудааст ва вобаста ба талаботи сармоягузорон метавонад тағйир ёбад.
Ба навиштаи Bloomberg, ин иқдом санҷиши муҳими омодагии бозор барои маблағгузории сармоягузориҳои соҳаи зеҳни сунъӣ хоҳад буд. Сармоягузорон ҳоло нигаронанд, ки хароҷоти бузург барои рушди ин технология кай ва то чӣ андоза фоида меоранд.
Тибқи ҳисобҳои Bloomberg, аз аввали соли 2026 ширкатҳои технологӣ аллакай нӯҳ бор вомбаргҳои дорои ҳаҷми на камтар аз 25 миллиард долларро баровардаанд. Дар аввал сармоягузорон ин гуна вомбаргҳоро фаъолона мехариданд, аммо баъдан эҳтиёткортар шуда, талаб кардани даромаднокии баландтарро оғоз карданд. Илова бар ин, болоравии меъёри асосии фоизӣ дар ИМА хароҷоти қарзгириро зиёд кардааст.
