Вазорати рушди рақамӣ, алоқа ва иртибототи оммавии Федератсияи Русия аз Хадамоти федералии зиддиинҳисории Русия дархост кардааст, ки масъалаи риоя нашудани қонунгузории Русия аз ҷониби Apple-ро ҳарчи зудтар баррасӣ намояд. Ин вокуниш пас аз ҳазфи барномаҳои VK аз мағозаи барномаҳои App Store баён шудааст.
Дар изҳороти вазорат омадааст: «Бар асоси хулосаҳои гирифташуда, аз ҷумла аз ҷониби ширкатҳои ҳуқуқии амрикоӣ, Вазорати рушди рақамӣ, алоқа ва коммуникатсияҳои оммавии Русия тасдиқ мекунад, ки барои бастани барномаҳои VK чунин асосҳо вуҷуд надоранд».
Дар вазорат бар ин назаранд, ки Apple аҳамияти иҷтимоии барномаҳои аз App Store ҳазфшударо нодида мегирад. Ба гуфтаи онҳо, ин барномаҳо барои муошират ва огоҳ кардани шаҳрвандони Русия, аз ҷумла дар бораи хатари ҳолатҳои фавқулода истифода мешаванд.
Мақомоти Русия ин иқдомро «ангезаи сиёсӣ» арзёбӣ намуда, онро ба ҳифзи манфиатҳои платформаҳои хориҷӣ рабт медиҳанд.
Пештар худи ширкати VK дар бораи ҳазфи барномаҳои худ аз App Store хабар дода буд. Ба рӯйхати барномаҳои хориҷшуда, илова бар шабакаи иҷтимоии VK, инчунин Дзен, VK Video, VK Мессенджер, VK Music, VK Знакомства ва Одноклассники дохил шудаанд.
Аввали моҳи июн аз App Store инчунин паёмрасони Макс хориҷ шуда буд. Ин барнома ҳамоно дар дигар мағозаҳои барномаҳо, аз ҷумла RuStore, Google Play, Huawei AppGallery ва дигар платформаҳо дастрас аст.
Вазорати рушди рақамии Русия изҳор доштааст, ки барои бозгардондани паёмрасони «Макс» ба App Store бо Apple музокиротро оғоз кардааст.
