Ҳайати ҳакамон дар шаҳри Лос-Анҷелеси ИМА натавонист оид ба парвандаи Ҷонатан Риндеркнехт, ки ба қасдан оташ задан муттаҳам мешавад, ба қарори ягона бирасад. Сӯхторе, ки ба гуфтаи муфаттишон ӯ 1 январи соли 2025 ба вуҷуд овардааст, яке аз маргбортарин сӯхторҳо дар таърихи шаҳр арзёбӣ мешавад.
Додситонҳо барои исботи айб маълумоти гирифташуда аз iPhone-и ӯ, наворҳои камераҳои назоратӣ ва нишондоди шоҳидонро пешниҳод карданд. Илова бар ин, онҳо ба таърихи мукотибаи муттаҳам бо ChatGPT низ такя намуданд.
Ба гуфтаи айбдоркунандагон, Риндеркнехт аз чатбот хоҳиш кардааст тасвирҳои оташро эҷод кунад, пурсидааст, ки чаро ҳамеша худро хашмгин эҳсос мекунад ва аз одамони сарватманд шикоят кардааст. Ҳамчунин ӯ аз ChatGPT пурсидааст, ки агар сӯхтор аз сигор сар зада бошад, оё шахсро метавон барои он ба ҷавобгарӣ кашид ё не.
Бо вуҷуди ин, ин далелҳо ҳайати ҳакамонро қонеъ накарданд. Аз 12 довар, 10 нафар ба бегуноҳии муттаҳам ва ду нафар ба гунаҳкор будани ӯ овоз доданд. Азбаски қарори якдилона қабул нашуд, додрас мурофиаро бе натиҷаи ниҳоӣ анҷом дода, баргузории баррасии такрории парвандаро таъин кард.
Яке аз ҳакамон дар суҳбат бо телевизиони маҳаллӣ гуфт, ки мукотиба бо чатботро далели ҷиноят намеҳисобад.
