Ширкати Tesla иддао дорад, ки ронанда, на низоми автопилот, дар садамаи марговаре, ки бо иштироки мошини барқии Model 3 дар иёлати Техаси ИМА рух дод, гунаҳкор аст.
Дар натиҷаи ин садама, мошин бо суръати баланд ба як хонаи истиқоматӣ бархӯрда, зани 76-соларо ба ҳалокат расонд.
Ба гуфтаи Tesla, ронанда «бо пахш кардани педали газ то ҳадди ниҳоӣ қасдан автопилотро ғайрифаъол кардааст». Роҳбари бахши зеҳни сунъии ширкат Эшок Эллусвами изҳор доштааст, ки ронанда мошинро то суръати 117 километр дар як соат расонда, ҳатто пас аз бархӯрд низ пахш кардани педали газро идома додааст.
Дар ҳамин ҳол, пулиси маҳаллӣ гуфтааст, ки ҳангоми рух додани садама низоми идоракунии худкори мошин фаъол будааст.
Айни замон мақомоти Иёлоти Муттаҳида истифодаи технологияи автопилот ё худкори Tesla-ро таҳқиқ мекунанд. Аз ҷумла, онҳо месанҷанд, ки оё ин система ҳангоми номусоид будани шароити обу ҳаво ва маҳдуд шудани қобилияти дидани роҳ, ронандаро ба таври кофӣ огоҳ мекунад ё не.
Ин таҳқиқот танҳо ба садамаи охирин маҳдуд набуда, фаъолияти низоми автопилоти Tesla дар чандин ҳодисаи дигар низ мавриди баррасии мақомоти танзимкунанда қарор дорад.
