6-ум Анҷумани Ассотсиатсияи футболи Осиёи Марказӣ (CAFA) 16 декабр дар Душанбе баргузор шуд.
Равшан Эрматов, ноиби аввали президенти Ассотсиатсияи футболи Ӯзбекистон дар ин анҷуман пешниҳод кардааст, ки мусобиқаи Ҷоми Наврӯз байни дастаҳои миллии Ассотсиатсияи футболи Осиёи Марказӣ баргузор карда шавад.
Дар анҷуман президенти Ассотсиатсияи футболи Осиёи Марказӣ Рустами Эмомалӣ, ноиби президенти CAFA Дастанбек Конокбоев (Қирғизистон), аъзои Кумитаи иҷроияи CAFA — Равшан Эрматов (Узбакистон) ва Меҳдӣ Тоҷ (Эрон), роҳбарон ва вакилони федератсияҳои футболи Тоҷикистон, Узбакистон, Қирғизистон, Эрон ва Афғонистон ширкат доштанд. Намояндагони Федератсияи футболи Туркманистон ба таври онлайн иштирок карданд.
Президенти Ассотсиатсияи футболи Осиёи Марказӣ, раиси Федератсияи футболи Тоҷикистон Рустами Эмомалӣ зимни сухани ифтитоҳӣ таъкид доштааст, ки соли 2022 нақша доранд ҳашт мусобиқаро барои синну соли гуногун ташкил намоянд.
