Хадамоти федералии зиддиинҳисории Русия ба ширкати амрикоии Apple ҳушдор дод. Дар изҳороти ин ниҳод омадааст, ки ширкат бояд шароити табъизомезро нисбат ба пойгоҳҳои ҷустуҷӯии Русия бартараф намуда, талаботи қонунгузории Русияро оид ба насби пешакии нармафзори ватанӣ дар дастгоҳҳои дорои низоми амалиётии iOS иҷро кунад.
Ба Apple барои иҷрои ин талабот то 15 июли соли 2026 муҳлат дода шудааст. Дар сурати иҷро нашудани он, ФАС нисбат ба ширкат парванда оғоз хоҳад кард. Агар дар ҷараёни баррасӣ нақзи қонун дар бораи ҳифзи рақобат исбот шавад, ширкат метавонад то 4 миллиард рубл ҷарима шавад.
ФАС таъкид мекунад, ки дар дастгоҳҳои дорои низоми амалиётии iOS (iPhone ва iPad) ба таври пешфарз як низоми ҷустуҷӯии хориҷӣ насб шудааст. Барои истифода аз системаҳои ҷустуҷӯии Русия, корбар бояд танзимотро дастӣ тағйир диҳад. Ба назари ФАС, чунин ҳолат барои таҳиягарони системаҳои ҷустуҷӯии русӣ шароити табъизомез фароҳам меорад.
Дар охири моҳи июн Вазорати рушди рақамии Русия аз ФАС дархост кард, ки масъалаи риоя накардани қонунгузории Русия аз ҷониби Apple-ро ҳарчи зудтар баррасӣ намояд. Ин иқдом пас аз он сурат гирифт, ки Apple барномаҳои холдинги VK-ро аз мағозаи App Store хориҷ кард.
Ба гуфтаи Вазорати рушди рақамӣ, ширкати амрикоӣ аҳамияти иҷтимоии барномаҳои хориҷшударо, ки шаҳрвандони Русия онҳоро барои муошират ва дастрасӣ ба иттилоот истифода мебаранд, нодида мегирад.
