Дар Тоҷикистон гузариш ба хизматрасониҳои пурраи электронӣ, ҳамгироии махзанҳои давлатӣ ва коҳиши расмиёти коғазӣ ҳамчун яке аз самтҳои асосии рушди иқтисоди рақамӣ муайян гардид.
19 август таҳти раёсати Президенти Тоҷикистон Эмомалӣ Раҳмон ҷаласаи якуми Шурои назди Президенти Ҷумҳурии Тоҷикистон оид ба рушди иқтисоди рақамӣ баргузор шуд. Дар он Барномаи миёнамуҳлати рушди иқтисоди рақамӣ барои солҳои 2026–2030 ва нақшаи рақамикунонии пурраи хизматрасониҳои давлатӣ баррасӣ гардид.
Яке аз масъалаҳои калидӣ — татбиқи принсипи «маълумот танҳо як маротиба» мебошад. Яъне дар оянда шаҳрванд набояд маълумотеро, ки аллакай дар махзани давлатии дигар мавҷуд аст, дубора ба мақомоти давлатӣ пешниҳод кунад.
Ҳамчунин таъкид шуд, ки пеш аз электронӣ кардани хизматрасониҳо худи тартиби онҳо бояд содда карда шавад. Ҳуҷҷатҳои такрорӣ, талаботи зиёдатӣ ва зарурати муроҷиат ба чанд мақом бояд бартараф гарданд.
Интернети босифат барои минтақаҳои дурдаст
Дар ҷаласа ба Хадамоти алоқа супориш дода шуд, ки ба баланд бардоштани сифат ва фарогирии интернет, бахусус дар минтақаҳои дурдаст, диққати бештар диҳад.
Дар баробари ин, барои солҳои 2027–2030 ҳадафҳои мушаххаси солона муайян карда мешаванд, то лоиҳаҳои рақамӣ бо муҳлат, маблағгузорӣ, масъул ва натиҷаи дақиқ амалӣ шаванд.
Аз «лоиҳаи рақамӣ» то натиҷаи воқеӣ
Дар ҷаласа таъкид гардид, ки ҳар як ташаббуси рақамикунонӣ бояд ба натиҷаи мушаххас барои шаҳрванд ва иқтисод равона шавад. Аз таҳияи чорабиниҳои такрорӣ ва маблағгузории лоиҳаҳои беасос бояд пешгирӣ карда шавад.
Самтҳои дигари афзалиятнок рушди инфрасохтори рақамӣ, таъсиси низоми миллии маълумот, ҳамгироии феҳристҳои давлатӣ, рақамикунонии бахшҳои иқтисодӣ ва иҷтимоӣ, рушди соҳибкории рақамӣ, истифодаи зеҳни сунъӣ ва таҳкими амнияти киберӣ мебошанд.
Чор принсипи асосӣ
Раиси Шуро Эмомалӣ Раҳмон рақамикунонии кишварро бар асоси чор принсип муҳим арзёбӣ карданд:
- Натиҷаи мушаххас барои инсон ва иқтисод;
- Сохтори ягонаи рақамии давлат;
- Пешниҳоди маълумот танҳо як маротиба;
- Дастрасии баробари шаҳрвандон ба хизматрасониҳои давлатӣ.
Ҳамин тавр, ҳадаф танҳо гузаронидани хизматрасониҳои коғазӣ ба шакли онлайн нест. Вазифаи асосӣ — сохтани низоми ягонаи рақамии давлат, ки дар он шаҳрванд вақти камтар сарф карда, хизматрасониро содатар ва шаффофтар дастрас намояд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
