Вазъи саломатии президенти ИМА Доналд Трамп дар миёни тарафдоронаш шубҳа ба вуҷуд овард, баъд аз он ки ӯ аз зинаҳои ҳавопаймо хеле оҳиста поён шуд. Дар ин бора нашрияи Daily Beast бо истинод ба навори видеоии фаъоли ҷунбиши «Make America Great Again» Пол Виллареал дар шабакаи иҷтимоии X хабар медиҳад.
Нашрия менависад, ки ин намояндаи Ҳизби ҷумҳурихоҳ баҳсҳои навро дар бораи саломатиаш ба вуҷуд овард, зеро ҳангоми поён шудан аз зинаҳои ҳавопаймо ҳаракаташ ноқулай ба назар мерасид.
Дар навор дида мешавад, ки пеш аз поён шуданн сиёсатмадор се маротиба бо кафи даст ба пои рости худ мезанад, сипас аз панҷараи зинапоя дошта, оҳиста-оҳиста поён мешавад.
Баъди фаромадан президенти Амрико ҳамроҳ бо муҳофизон ба мошин мешинад. Аз тирезаи мошин дида мешавад, ки ӯ як шишаи нӯшокиро ба даст мегирад.
Дар аввали моҳи декабр Трамп як қатор расонаҳои амрикоиро ба тӯҳмат айбдор карда буд, ки дар бораи бад шудани вазъи саломатиаш матолиб нашр кардаанд, ва таҳдид намуд, ки нисбат ба онҳо чора меандешад.
Роҳбари ИМА изҳор дошт, ки ӯ вазифаҳои президенти кишварро бо муваффақият иҷро мекунад ва мунтазам аз муоинаи тиббӣ мегузарад.
Дар охири моҳи ноябр нашрияи The New York Times матлабе нашр кард, ки дар он, аз ҷумла, гуфта мешуд барои Трампи 79-сола нигоҳ доштани симои сиёсатмадори пурэнержӣ ва фаъол торафт мушкилтар мегардад. Рӯзноманигорон навишта буданд, ки ӯ гӯё чанд маротиба дар чорабиниҳои Кохи Сафед хобаш бурдааст ва баъзан суханронии дуруст намекунад.
